POLE

1. Sijivishi uhakimu , uungu na ujuaji
Najitwika jukumu , kunena langu hitaji
Nahitaji ‘siwe ngumu , samehe na ufariji
Sema pole ukosapo , sema pole ukoswapo



2. Dunia hii ni moja , waliomo ndio wengi
Na ilivyojaa vihoja , utakosewa na vingi
Kwako usiwe na haja , kubeba vyote kwa wingi
Sema pole ukosapo , sema pole ukoswapo



3. Utaumia moyoni , ukiendekeza chuki
Weka toba rohoni , chuki mzazi wa dhiki
Usifungie kooni , zahama litabiriki
Sema pole ukosapo , sema pole ukoswapo



4. Mengine ni makusudi , akuudhi navyopenda
Mengine niya ahadi , kukumiza kukufyanda
Usitake kujinadi , we poa usijekonda
Sema pole ukosapo , sema pole ukoswapo


5. Hata kabla yafike, ukiona yaepuke
Katu usiangaike , kukabili uumbuke
Na ndovu msamba wake , ‘sishindane upasuke
Sema pole ukosapo , sema pole ukoswapo


6 Kuongea huliwaza , hutakatisha nafsi
Usiongee kuumiza , kulipizia kisasi
Ulimi funza kusaza , hicho ni kiungo hasi
Sema pole ukosapo , sema pole ukoswapo

7. Yako toba ndilo jibu , la kikwazo siku zote
Uongelee sababu , sio lengine lolote
kishasema kuwa bubu , sibishanie lolote
Sema pole ukosapo , sema pole ukoswapo.

8. Hapo mimi ninakoma , nikiongeza ‘takosa
Yote niliyoyasema , ndiyo yanayokupasa
vuliwa nguo chutama , ndio uungwana hasa
Sema pole ukosapo , sema pole ukoswapo.

Shairi hili limetungwa na mbilA